Col 2 | KYG | STEP | Nagaemo lapakae'e Leyotisiya taonifi'mo mai'naya vaya'e o'nage'naya vaya'efe'mo naipafi'mo nahausoli hu'ne'na nayamukiki hu'na ali'ya ne'aluva ali'yafe'mo nava gemo afisayafe'mo nahau'niye.

Colossians 2

1 Nagaemo lapakae'e Leyotisiya taonifi'mo mai'naya vaya'e o'nage'naya vaya'efe'mo naipafi'mo nahausoli hu'ne'na nayamukiki hu'na ali'ya ne'aluva ali'yafe'mo nava gemo afisayafe'mo nahau'niye. 2 Lapaipamo'mo atete osuno lokiya vaino hane'nisigetapa lapau lapayamopafi'mo lapau'nisigetapa magoke lapaipa lapakesamo alita maisayafe'mo ali'ya'mo ne'aluve. Ani kava huta mai'netapae'mo Goti'a hogoteno alino fala kino ate'neno alino lapaveli'niya ne'mo Kalaisi'mo ageta aeto hutetapa lole lapakesamo o'afitapa lusi kava huta magoke lapakesamo afisayafe'mo nahau'niye. 3 Kagemi ya'apimo ali'a fala ki'a ne'malaya kava huno Kalaisi aipafi'mo muki alagepa hu'a afite'a agesaya ya'amo fala kino hane'niye. 4 Mago vaya'mogimo haga lapaisiya agufa gemo hute'apae'mo lapakesamo faite'a humi olapatesayafe'mo mani gemo lapa nepauve. 5 Nagufa'amo lapakae'e'mo lokae'na o'mai'nova'monanafa naune'name'amo'mo lapakae'e'mo magokepi lokaeno mai'nige'nae'mo lapakovana Kalaisife'mo lokiya vaitapa lapakesa afita fatago nehutapae'mo magokepi lokaeta mai'nage'na lapakete'nae'mo namogaga ne'auve.

Kalaisipi'mo alagepa hu'a ne'maiya kavafe'mo hu'niya gemae

6 Lapakaemo Kalaisi Yesufe'mo, Ala kava netimo mai'niye, hutapa ali'naya kava'mo hutapa agaepi'mo maime maime viyo. 7 Mai'netapae'mo yosamo'mo hafu'yamo ne'aeya kava hutapa agaete'mo atafauta alagi hutapa maiyo. No'mo yafate'mo fai'a ne'ataya kava hutapa Kalaisite'mo atafauta alagi hu'netapae'mo alita lapaya male'nona gelefe'mo lokiya vaitapa mai'netapae'mo mago'e mago'e hutapa lusi kava huta hao ke hetapa maiyo. 8 Fiku yanage'a mago vaya'mogimo ma mopafi vaya'mogi agete'a afi'naya agufa gemo huge afa aigofe gemo huge nehu'a humi lapategayanagi ehetapiye. Mani gemo Kalaisitegati'mo no'mefa apakinago vaya'mogi nehaya agufa gemo ma mopafi kava'mo ani kava'mo huno afole ai'niye, hu'a nehaya gee'mo apakesamo ne'afiya yapifati'mo ne'e. 9 Muki Goti aipa agesamo Kalaisi aipa agesafi'mo alagi lama ge huno hanege hanege huno nehane. 10 Agaemo muki apaune'apame'e vaya'mo yagai'a ne'apataya vaya'aite'e ala kava vaya'aite'e'mo yagaino ne'apateya vekamo mai'nigetapae'mo agaepi'mo mai'nageno agaepi hane'niya ya'amo lapakaepi'mo havai te'niye. 11 Kalaisipi'mo mai'nageno'ae'mo vaya'mogi lapakufamo lagau'a olapate'nafa Kalaisi'a lapakufamo lagaugekana huno hosu kava'mo nehiya atafa lapaipa lapakesamo alino atale'niye. 12 Ani agufa kava'mo hane'nige'a ani'mo fale'a nelapatageno'ae'mo Goti'a lapakesa afita fatago nehaya kavateti'mo Kalaisi'e'mo kanolufi'mo kino lapateteno Kalaisi'e'mo magokepi ago alino he tino lapate'niye. Goti'a Kalaisi'mo alino he tino ate'niya vekamo himamu'aleti'mo lapaipafi'mo ali'ya'mo ali'nigetapa lapakesa afita fatago hu'nae. 13 Hosu lapakufamo lagauta o'ataletapa hosu kavapi'mo mai'netapae'mo fali'naya vayakana huta mai'nageno'ae'mo Kalaisi'e'mo ago alino he tino lapate'niye. Goti'a muki hosu kavatimo alino ne'ataleno'ae'mo 14 anonatilefe'mo avo'mo kae male'niya gemo ma kava hiyo ina kava osiyo, huno hu'niya ke'aepa gemo aeno kalo paeno atale'niye. Goti'a ani gemo'a aeno lagaseno kame huno late'niya gemo alino ataleteno malipu yosale'mo nili ai'niye. 15 Kalaisi'a faliteno'ae'mo yagai'a ne'apataya vaya'e ala kava vaya'e'mo agai'amo ago aeno apakaseteno kame hisaya ya'apimo apayapati'mo alino hapafaleno nofi kino apateteno vaya'ai apaulagale'mo heno apavayu hulino u'niye. 16 Ani kava hu'niya'mofe'mo vaya'mogimo, ma ne'ya neyo, ina ne'ya o'neyo, hu'a nehu'apae'mo, hopa afinafe'mofi saufa kaile hopa afinafe'mofi sapati afina'mo mai'a falu nehaya afinafe'mofi, alita aeto hu maletetapa akame hiyo, hu'a lapa paisagetapae'mo akame hisaya kava'mo ohane'niye. 17 Mani agufa kava'mo afole aisiya kavafe'mo aune kava'mo hane'niya'monanafa Kalaisi'a aune'a age'naya agufa'amo ago afole ai'niye. 18 Mago vaya'mogimo amega apakufaleti'mo apakai'api apaki'apimo ali'a afepi ne'apataya kavafe'mo amuse hu'a enisole vaya'aife'mo mono nehae. Apakaemo kavatapimo ali'a fako hu'a lapatete'apae'mo, hosu kava'mo nehae, hu'a hisaya gemo o'afiyo. O'age'naya kava'mo agesayafe'mo apakai'apimo fiku himu'namu kava'mo nehae. Atafa apaipafati'mo, ala vaya'mo mai'none, hu'a fiku apakesamo ne'afiye. 19 Apakaemo agufamo agenopagana huno mai'niya vekamo Kalaisi'mo o'atafau'a afa'a atale'nae. Kalaisi'a agufale'mo yagaino ne'ategeno'ae'mo aeno hapai'niya ya'a'e aganuna'e'mo aeno haniteno alino magokepi lokaeno ate'nigeno Goti himamu'aleti'mo ko nesiye. 20 Lapakaemo ma mopafi'mo hogote'a hu'a aepa fai'a hu'naya gelefe'mo fali'nisaya'mo'mo na kava higetapa ina ya o'aliyo, ma ne'ya o'neyo, ani yate'mo ame o'aliyo, hu'a nehaya gemo ma mopafi vayakana hutapa ma mopafi vaya'ai ke'aepa ge'apimo akame nehae. 22 Mani ke'aepa gemo ali'a ne'a hano hu'a atalesayafeke'mo hane'niye. Ma mopafi vaya'ai ke'aepa gemo ali'a apaya ne'malaya ke'aepa ge'ageke'mo hane'niye. 23 Mani agufa ke'aepa gemo'a mono hisayafe'mo alino he tino ne'apate. Aigofe gemo nehu'a apakufamo ali'a afepi apate'a apakafu kisiya ya'mo ali'a apakufamo amisayafe'mo alino he tino ne'apate. Ne'apateya'mofe'mo afiteta age'nona kava'mo hane'niye, hu'a apakesamo ne'afiya'monanafa mani agufa ke'aepa gemo'a apakufamo'mo hau'niya kavate'mo yagai'a atesayafe'mo hapa no'mae.